Një grabitje me armë zjarri ka ndodhur mëngjesin e 20 tetorit në lagjen 4 të qytetit të Sarandës, në banesën e noterit Thoma Kaçi. Noteri Thoma Kaçi ishte duke dalë me gruan dhe djalin në mëngjes kur dëgjoi derën të hapej nga dy grabitësit e maskuar dhe të armatosur me kallashnikov. Ata i kanë detyruar që të futen brenda, i kanë lidhur në karrige dhe më pas u bënë presion për t’u treguar se ku i mbanin paratë.
Strukturat hetimore të Komisariatit të Policisë Sarandë, nën drejtimin e Prokurorisë së Rrethit Gjyqësor Sarandë kanë bërë të mundur që të finalizohet operacioni i koduar si “Butrinti”, duke vendosur në pranga 3 persona të dyshuar si autorë të ngjarjes. Ndërkohë që janë sekuestruar 2 automjete dhe 4 aparate celular.
Policia bën të ditur se vijon puna për identifikimin e personave të tjerë të përfshirë në grabitjen e dhunshme të noterit Thoma Kaçi në Sarandë.
Njoftimi i Policisë së Shtetit:
Sarandë
Finalizohet operacioni policor i koduar “Butrinti”.
Zbardhet dhe dokumentohet ngjarja e ndodhur më datë 20.10.2021, në lagjen nr.1, Sarandë, ku nën kërcënimin e armës dhe dhunës, shtetasit Thoma Kaçi (noter), në banesë, i morën një shumë parash.
Vihen në pranga 3 autorët e dyshuar të ngjarjes.
Sekuestrohen 2 automjete dhe 4 aparat celular.
Disa ditë pas ngjarjes, Policia gjeti dhe sekuestroi armën e zjarrit automatik të përdorur në këtë ngjarje.
Strukturat hetimore të Komisariatit të Policisë Sarandë, nën drejtimin e Prokurorisë së Rrethit Gjyqësor Sarandë, pas një pune hetimore të pandërprerë, bënë të mundur zbardhjen dhe dokumentimin e vjedhjes me dhunë dhe nën kërcënimin e armës, të një shume parash në banesën e shtetasit Thoma Kaçi, ngjarje e ndodhur në datë 20.10.2021, në lagjen nr.1, Sarandë. Mbi bazën e provave të siguruara nga hetimi, Prokuroria e Rrethit Gjyqësor Sarandë nxori urdhrat e ndalimit për autorët e dyshuar.
Në këtë kuadër, shërbimet e Komisariatit të Policisë Sarandë, në bashkëpunim me Forcën Operacionale në DVP Vlorë, organizuan dhe finalizuan operacionin policor të koduar “Butrinti”, në kuadër të të cilit u bë kapja e tre autorëve të dyshuar dhe ekzekutimi i urdhrave të ndalimit të caktuar nga Prokuroria për shtetasit:
Elis Avduli, 52 vjeç, lindur dhe banues në Konispol, i dënuar më parë në shtetin grek, për veprën penale “Trafikimi i narkotikëve”;
Oltjon Kolonja (Pula), 39 vjeç, lindur në Krujë dhe banues në Sarandë;
Vladrias Himaj, 34 vjeç, lindur në Berat dhe banues në Sarandë.
Në cilësinë e provës materiale janë sekuestruar 2 automjetet e dyshuara të përdorura në këtë ngjarje dhe 4 aparate celular.
Vijon puna për identifikimin e personave të tjerë të implikuar në këtë ngjarje.
Materialet shtesë iu referuan Prokurorisë së Rrethit Gjyqësor Sarandë, për veprime të mëtejshme.
