Një firmë uji ka rënë pre e një grabitje mbrëmjen e kaluar. Ngjarja ka ndodhur rreth orës 22:00 të mbrëmjes së shkuar, në Zhamë-Sektor, njësia administratike Dushk në Lushnje.
Dy persona, ende të paidentifikuar nga Policia, kanë shkuar të maskuar në zyrat e kompanisë dhe kanë arritur që të marrin një sasi të konsiderueshme parash. Ata kanë kërcënuar rojen në mënyrë që të mund të futeshin brenda zyrave të kompanisë, për të kryer më pas grabitjen.
Më pas ata janë larguar, ndërsa policia ka shkuar në vendin e ngjarjes. Grupi hetimor ka nisur gjithashtu hetimet për të bërë të mundur kapjen e autorëve. Mësohet se janë sekuestruar pamjet filmike të kamerave të sigurisë, të cilat mund të zbardhin detaje për autorët.
Pritet që edhe vetë roja e kompanisë të merret në pyetje për të rrëfyer detaje që ka parë tek autorët gjatë bisedës me ta, në mënyrë që të bëhet i mundur identifikimi i tyre.
Njoftimi i policisë:
“Më datë 30.03.2021, rreth orës 22:00 në fshatin Zhamë Sektor, Njësia Administrative Dushk, dy persona ende të paidentifikuar duke kërcënuar rojen, kanë marrë një sasi parash të një firme uji. Grupi hetimor nën drejtimin e Prokurorisë po punon për zbardhjen e plotë të ngjarjes, identifikimin dhe kapjen e autorëve”.
