Mbrëmjen e kaluar rreth orës 21:00 në fshatin Katjel të Prrenjasit persona ende të paidetifikuar i vodhën me dhunë një sasi lekësh një kambisti në këtë qytet.
Mësohet se kambisti Bashkim Shegani po kthehej në shtëpi kur tre grabitësit me motorë i dolën para dhe pasi e dhunuan i morën 40 milionë lekë të vjetra.
I pyetur ditën e sotme nga AbcNews, Shegani tha se në momentin që ndodhi ngjarja ishte bashkë me të birin dhe po ktheheshin për në shtëpi.
Sipas Sheganit, kanë qenë tre persona të maskuar ata të cilët i kanë bërë prite dhe në një moment frika më e madhe e tij ka qenë djali, pasi ishin të armatosur.
“Mbrëmë rreth orës 20:00 , në momentin që gruaja dhe vajza ikën në shpi isha me djalin, sapo parkova makinën më dolën tre veta të maskuar me kallash, më goditën dhe më morën lekët. I ndoqa pak dhe më pas njoftova policinë. Djalin e kisha në vendin e parë dhe në momentin që unë zbrita për të marrë atë më ka ndodhur dhe ngjarja, dhe në atë moment frika ime më e madhe ishte për djalin pasi ato ishin të armatosur. Një nga ato e pash, ndërsa dy të tjerët jo, kam dyshimet e mira dhe i kam deklaruar në polici,” është shprehur kambisti.
