Gjykata e Dibrës ka vendosur masën e sigurimit “shtrim i detyrueshëm në një spital psikiatrik” për Itles Sulën, të riun që pak ditë më parë goditi me thikë të ëmën, duke e plagosur rëndë me shtatë goditje.
Ngjarja e rëndë ndodhi në banesën e familjes, ndërsa 50-vjeçarja u transportua menjëherë në Spitalin e Traumës në Tiranë për trajtim të specializuar. Sot, autori i dyshuar doli para gjykatës, ku u njoh me masën e sigurisë.
Sipas raportimeve, pas ngjarjes rezultoi se i riu kishte shfaqur më herët shenja depresioni, të cilat dyshohet se lidhen me probleme të vazhdueshme ekonomike dhe mungesën e punësimit.
Njoftimi i Gjykatës:
Lidhur me çështjen penale Nr. 62 Akti datë regjistrimit 04.08.2025 me objekt: “Vleftësimin si të ligjshëm të arrestit në flagrancë të personit nën hetim H.S”, akuzuar për kryerjen e veprës penale ‘Plagosje e rëndë me dashje’ parashikuar nga neni 88/2 të Kodit Penal.
Gjykata në përfundim të shqyrtimit, me Vendimin nr.62, datë 05.08.2025:
VENDOSI:
1. Pranimin e kërkesës.
2. Vlerësimin si të ligjshëm të arrestit në flagrancë të personit nën i personit nën hetim H. S. (i biri i B. dhe N., i datëlindjes xx.10.1999), i dyshuar për kryerjen e veprës penale të “Plagosja e rëndë me dashje” parashikuar nga neni 88/2 i Kodit Penal.
3. Caktimin e masës së sigurimit personal “Shtrimi i përkohshëm në një spital psikiatrik”, parashikuar nga neni 239, i Kodit të Procedurës Penale, ndaj personit nën hetim H.S., dyshuar për kryerjen e veprave penale të “Plagosja e rëndë me dashje” parashikuar nga neni 88/2 i Kodit Penal.
4. Ngarkohet Prokuroria pranë Gjykatës së Shkallës së Parë të Juridiksionit të Përgjithshëm Dibër për ekzekutimin e këtij vendimi.
5. Shpenzimet gjyqësore siç janë bërë.
6. Kundër këtij vendimi lejohet ankim në Gjykatën e Apelit të Juridiksionit të Përgjithshëm, brenda 5 (pesë) ditëve, duke filluar ky afat nga dita e nesërme e njoftimit të arsyetuar të tij.
U shpall në Peshkopi, sot më dt 05.08.2025
