Ditën e djeshme 31 vjeçari Gerti Shehu goditi me grusht kryetarin e Partisë Demokratike, Sali Berishën.
Ndërkohë që ditën e sotme Policia e Shtetit ka zbardhur 2 akuzat që rëndojnë ndaj tij. 31-vjeçari do të hetohet për dy vepra penale, goditje për shkak të detyrës dhe plagosje e lehtë me dashje. Mbrëmjen e së martës, ai u tentua të rimerrej për të disatën herë në pyetje.
Theksojmë se Gert Shehut arrestimi iu komunikua në Spitalin e Traumës, ku vijon të marrë mjekim, për shkak edhe të dëmtimeve që mori në trup nga bodigardët e Berishës.
Njoftimi i Policisë së Shtetit:
Strukturat e posaçme të Policisë Gjyqësore të Policisë së Shtetit, në bashkëpunim me specialistët e Seksionit për Hetimin e Krimeve ndaj Jetës, të DVP Tiranë, dhe me shërbimet e Komisariatit të Policisë Nr. 1, pas kryerjes së një sërë veprimesh hetimore dhe procedurale, nën drejtimin e Prokurorisë pranë Gjykatës së Rrethit Gjyqësor Tiranë, për ngjarjen e ndodhur më datë 06.12.2022, arrestuan në flagrancë shtetasin:
Gert Shehu, 31 vjeç, banues në Tiranë, për goditje për shkak të detyrës dhe plagosje me dashje.
Nga veprimet hetimore ka rezultuar se ky shtetas ka goditur me grusht në fytyrë, deputetin Sali Berisha, duke i shkaktuar dëmtime fizike, gjatë kohës që ai po lëvizte me këmbë, në bulevardin Zhan D’Ark, në drejtim të vendit ku do të zhvillohej protesta e planifikuar.
Materialet i kaluan Prokurorisë pranë Gjykatës së Rrethit Gjyqësor Tiranë, për veprime të mëtejshme.
