Godina e televizionit kombëtar Top Channel është sulmuar me breshëri plumbash dhe për pasojë ka mbetur i vrarë roja i objektit. Sulmi ka ndodhur në orët e para të mëngjesit të së hënës. Mësohet se viktima është, Pal Kola 60 vjeç i cili u qëllua me armë rreth orës 01:00, në rrethana ende të paqarta.
Ndërkohë pak orë më parë është gjendur I djegur një automjet tip Range Rover në autostradën e Kavajës, tek vendi i quajtur “Përroi i Agait”, i cili dyshohet se u përket autorëve.
Sipas informacioneve, targat e mjetit rezultojnë të vjedhura.
Policia është në vendngjarje, ndërsa grupi hetimor vijon punën për zbardhjen e rrethanave.
Gjithashtu janë ngritur pika kontrolli dhe vijon puna për identifikimin dhe kapjen e autorëve.
Tiranë/Informacion paraprak
Më datë 27.03.2023, rreth orës 01:00, në Mëzes, në rrethana ende të paqarta, nga persona ende të paidentifikuar, është qëlluar me armë zjarri në drejtim të ambienteve të Top Channel.
Si pasojë e të shtënave ka humbur jetën roja i sigurisë shtetasi P. K., 60 vjeç (punonjës i një shoqërie për ruajtjen fizike të objekteve).
Është ngritur grupi hetimor dhe nën drejtimin e Prokurorisë vijon puna intensive për zbardhjen e rrethanave të ngjarjes, sekuestrimin e provave që do të shërbejnë për zbardhjen e ngjarjes, identifikimin dhe kapjen e autorëve.
Shërbimet e Policisë kanë ngritur pikat e kontrolleve dhe vijon puna për identifikimin e kapjen e autorëve.
