Gjyqatari Bari Shyti u shkarkua ditën e djeshme nga Komisioni i Pavarur i Kualifikimit, por këtë vendim nuk e ka pritur aspak mirë dhe duket se ka një inat të pashpjegueshëm me qytetarët që e pritën me protestë.
Shyti ka bërë kallëzim për ndjekje penale për kryerjen e veprës penale të “Ushtrimi i ndikimit të paligjshëm ndaj personave që ushtrojnë funksione publike”, “Mosmarrje e masave për të ndërprerë gjendjen e paligjshme”, si dhe “Organizimi dhe pjesëmarrja në grumbullime e manifestime të paligjshme”, ndaj qytetarëve që e pritën me pankarta në duar.
Siç duket, sipas Shytit kanë qenë qytetarët ata që kanë ndikuar në vendim dhe jo fakti se ai nuk mund të justifikonte mijëra euro nga kromi të cilat as nuk ishin përfshirë në tatim.
“Në datë 23.03.2021 në orën 10:00 ishte planifikuar seanca dëgjimore pranë KPK, e cila do të zhvillohej në sallën nr.1 të godinës së ish Pallatit të Kongreseve. Aty rreth orës 10, në çastin e hyrjes në godinë, në hyrje të saj jam ballafaquar me një grup prej 7-8 personash, të cilët mbanin pankarta në duar, disa prej të cilave me përmbajtje komprometuese për procesin që pritej të zhvillohej”, thuhet në një pjesë të kallëzimit.
Një grup prej rreth 10 qytetarësh ishin mbledhur para Pallatit të Kongreseve (ku u zhvillua seanca e dëgjimore” dhe mbanin në duar pankarta që lexonin Gjyqtari i korruptuar, me pasuri marramendëse të padeklaruara, lokale, miniera…” apo “KPK zvarrit procesin, nuk verifikon arsimin e veterinerit Bari Shyti”. Me sa duket tashmë ish-gjyqtari, nuk i ka pritur aspak mirë këto thirrje të qytetarëve, disa prej të cilëve kanë pasur çështje të gjykuara nga ai. Madje në vendimet që Shyti ka marrë, disa kanë qenë totalisht të pabazuara. Një qytetare që foli për BIRN, por nuk pranoi të identifikohej tha se kishte humbur disa çështje dhe vendimet e Shytit kishin qenë të pabazuara. Gruaja nuk pranoi të identifikohej për shkak të frikës “Më vijnë te dera e shtëpisë pastaj,”ka thënë ajo. Dhe kallëzimi penal që gjyqtari ka bërë ndaj qytetarëve e tregon qartë se ndikimi dhe pushteti i tij ka qenë aq i madh sa qytetarët janë të frikësuar të flasin.
Pas vendimit të KPK, Bari Shyti ka të drejtë të ankimojë në Kolegjin e Posaçëm të Apelimit brenda 15 ditëve. Nuk dihet ende nëse Shyti do e apelojë vendimin, por hapat e para që ndërmori me kallëzimin penal tregojnë se nuk është i gatshëm të tërhiqet. Mbi të gjitha, nëse e apelon vendimin mbetet për t’u parë vendimi që do të marrë KPA me disa nga figurat problematike që ka në përbërje të saj.
