Seanca gjyqësore për vrasjen e Liridona Ademajt ka vijuar me tension dhe përballje të forta mes të akuzuarit Naim Murseli dhe dëshmitarëve, përfshirë kunatin e tij, Leonard Ademajn.
Në sallën e gjyqit, Naim Murseli mori fjalën dhe iu drejtua drejtpërdrejt kunatit të tij me një pyetje:
“E kam një pyetje për Leonardin. Për 13 vjet martesë, a është ankuar ndonjëherë motra jote për mua apo për raportin tonë?”
Leonardi u përgjigj duke pranuar se gjatë gjithë kohës së martesës së motrës nuk kishte pasur ankesa, përveçse në muajt e fundit para ngjarjes:
“Jo, nuk është ankuar… përveçse disa muaj para se të ndodhte ngjarja. Ishte prekur shumë nga një aferë tradhtie e Naimit me një të afërm. Por ajo vetë e kishte zgjidhur dhe ne nuk e kemi kundërshtuar.”
Më tej, Murseli iu referua aktakuzës dhe dy motiveve të përmendura nga prokuroria, duke kërkuar opinionin e Leonardit për to:
“Në aktakuzë prokurorja përmend dy motive: njëra që ka të bëjë me financa dhe kinse me sigurim jetësor, që nuk dihet asgjë për atë sigurim jetësor se si janë kushtet. Motivi tjetër që thuhet është kinse Liridona më ka tradhtuar. Cilin motiv e beson Leonard Ademaj?”
Në përgjigje, Leonardi tregoi se kishte dijeni për deklaratat e Murselit lidhur me sigurimin jetësor:
“Ti i ke thënë babit në shtëpi që ‘ja kam bë një sigurim Liridonës se nëse e gjen diçka, përfitojmë shumë dhe fëmijët sigurohen’. Motivin kinse Liridona të ka tradhtuar e ke thënë ti vetë, nuk e ka thënë ajo. Për sigurimin, ti e di më mirë, se ia ke bërë asaj, jo vetes. Po ashtu e di mirë kur i ke thënë babit në shtëpi që ‘ja kam bë një sigurim Liridonës se nëse e gjen diçka, përfitojmë shumë dhe fëmijët sigurohen’. Përveç versionit të tradhtisë, të dy versioneve të tjera u besoj plotësisht.”
Liridona Ademaj është vrarë në mbrëmjen e 29 nëntorit të 2023-tës, në rrugën “Dalip Alshiqi” në Prishtinë. Fillimisht ishte raportuar se bëhet fjalë për një grabitje, e më pas Prokuroria bëri të ditur se është inskenim i një grabitjeje.
