Ditën e sotme, Gjykata e Tiranës ka vendosur që të njohë Kuvendin e 11 Dhjetorit.
Me vendimin e dhënë paraditen e kësaj të premteje në Gjykatën e Tiranës, tashmë PD do të ketë një statut të ri, dhe drejtimin zyrtar të kësaj force politike e ka Komisioni i Rithemelimit, i përbërë nga më shumë se 20 anëtarë.
Përfaqësuesi ligjor i Komisionit të Rithemelimit, Ivi Kaso, është shprehur ëpr mediat pas vendimit të gjykatës. Kaso theksoi se që nga ky moment, Gjykata njeh logon e re të PD-së, dhe njeh Komisionin si organin e vetëm drejtues të partisë më të madhe të opozitës.
Ai shtoi se vendimi i Gjykatës është i padiskutueshëm dhe do të duhet të zbatohet. Duke marrë parasysh statutin e 11 Dhjetorit, asnjë nga strukturat drejtuese të PD-së nuk do të njihen. Kaso tha se një prej pikave të vendimeve të marra në datën 11 Dhjetor, është shpallja i paligjshëm i Kuvendit të 18 Dhjetorit, duke bërë të pavlefshëm edhe procesin gjyqësor që mund të ndiqet më tej sipas tij. Juristi deklaroi se vendimi i ditës së sotme nuk mund të apelohet, pasi Komisioni i Rithemelimit, ishte e vetmja palë e interesuar në këtë çështje.
“Gjykata sot mori vendimin e paralajmëruar nga ana jonë, që në 11 Dhjetor, kur u mbajt Kuvendi i vërtetë i demokratëve. PD i rikthehet sërish sot demokratëve, me logon dhe simbolet e reja, dhe për të marrë vendime të rëndësishme, siç ishte shkarkimi i kryedemokratit Lulzim Basha, mosnjohja e konfigurimit të Kryesisë, njohjen e Komisionit të Rithemelimit, si institucionin drejtues të vetëm të PD-së deri në Kuvendin e 30 Prillit. Është një vendimmarrje e vonuar, por më mirë vonë se kurrë. Që nga data 11 Dhjetor ka vetëm një PD, nuk ka asnjë kërkesë të bashkimit të Kuvendit të Korrikut, me të 11 Dhjetorit. Ankimi i paraqitur nga përfaqësues pa tagër të PD-së për Kuvendin e Korrikut, nuk ndikon në asnjë rast te çështja e 11 Dhjetorit”, tha Kaso.
