Ish-Kryeministri Sali Berisha ka ripërsëritur akuzat e tij për një komplot transnacional shqiptaro-britanik kundër tij, pasi Komisioni i Apelimit në Britaninë e Madhe refuzoi ankesën për shpalljen ‘non grata’ nga Mbretëria e Bashkuar.
Në një fjalim për mbështetësit e tij, Berisha deklaroi: “Pas përjashtimit nga hyrja në Britaninë e Madhe, vendosa të padis për shpifje autorët e këtyre akuzave të ulëta. Ligji britanik kërkonte që fillimisht të ankohesha në Komisionin e Posaçëm të Apelimit, i cili shqyrton vendimet e Home Office. Ky komision nuk hetoi nëse akuzat ndaj meje ishin të vërteta, por vetëm nëse Sekretarja e Shtetit i kishte analizuar drejt provat para saj.”
Berisha theksoi rëndësinë e kësaj procedure për të gjithë shqiptarët, duke shtuar: “Kjo procedurë tregoi se ndaj meje nuk kishte asnjë provë apo fakt, vetëm shpifje dhe trillime. Në vendimin e Home Office u fshehën mijëra faqe të dorëzuara nga ne për të fshehur mashtrimin fillestar.”
Sipas Berishës, SIAC konfirmoi se përfaqësuesit ligjorë të qeverisë nuk i dorëzuan provat e tij në Home Office, duke pretenduar se ato ishin dorëzuar me vonesë. “Provat e mia rrëzonin mashtrimet e diplomatëve të korruptuar dhe korruptorëve të tyre, Edi Rama, Erion Veliaj dhe Lulzim Brava. Mijëra faqe nuk u dorëzuan Sekretares së Shtetit sepse do të zbulonin të vërtetën,” tha Berisha.
Ky zhvillim e tensionon më tej situatën mes Berishës dhe autoriteteve britanike, duke ngritur pyetje mbi transparencën dhe drejtësinë e procesit.
