Gjykata Kushtetuese ka urdhëruar sot Kuvendin që të dërgojë menjëherë në Gjykatë mocionin e deputetëve të opozitës për mandatin e deputetes socialiste Olta Xhaçka. Në një deklaratë për mediat, kryetarja e Gjykatës Kushtetuese, Holta Zaçaj, theksoi se vendimet e Gjykatës Kushtetuese kanë efekt të ligjit dhe asnjë institucion tjetër nuk mund t’i vërë ato në diskutim. Zaçaj bëri të qartë se Kuvendi duhet të zbatojë këtë vendim pa asnjë vonesë.
“Gjykata ritheksoi se vendimet e saj kanë efektet e forcës së ligjit. Asnjë organ nuk ka të drejtë t’i vërë ato në diskutim dhe aq më tepër të mos pranojë t’i zbatojë. Ndikimi i padiskutueshëm i vendimeve të saj është i tillë që i imponon të gjithë organeve shtetërore fuqinë detyruese të vendimit të saj,” tha Zaçaj.
Vendimi erdhi pas një padie të ngritur nga grupi i deputetëve të opozitës, të cilët kundërshtuan mandatin e Xhaçkës për shkak të shpalljes së bashkëshortit të saj, Artan Gaçi, si investitor strategjik, një çështje që ngriti pretendime për konflikt interesi. Mocioni për heqjen e mandatit të Xhaçkës u ndërmor nga opozita që në qershor 2022 dhe ka qenë objekt debati politik dhe juridik që atëherë.
Në një zhvillim të mëparshëm, Kuvendi kishte kërkuar pezullimin e çështjes dhe dërgimin e saj për interpretim në Komisionin e Venecias, duke cilësuar si të paqarta vendimet e mëparshme të Gjykatës Kushtetuese. Megjithatë, Gjykata Kushtetuese ka vendosur që Kuvendi duhet të respektojë vendimin dhe të dërgojë mocionin për shqyrtim, duke theksuar se ky është një detyrim i pamohueshëm ligjor
