Gjykata e Tiranës ka pranuar kërkesën e Prokurorisë për kalimin në gjyq të dosjes ndaj kompanisë “Salillari” për akuzën e ndërtimit të paligjshëm.
Gazetareforma ka raportuar gjithmonë për kullat pa leje në Tiranë.
Lexo këtu( https://gazetareforma.com/ligji-i-dyfishte-i-kullave-te-tiranes-burg-per-te-vegjelit-heshtje-per-baronet/ )
Hetimet kanë zbuluar se kjo kompani kishte marrë leje për ndërtimin e një godine me 6 kate mbi tokë, përveç parkimit, nga Bashkia e Tiranës në vitin 2020.
Megjithatë, gjatë kontrollit të mëpasshëm, autoritetet kanë konstatuar se objekti kishte një kat shtesë pa leje, me një sipërfaqe prej rreth 2,500 m2.
Pas krahasimit të dokumentacionit me Bashkinë e Tiranës, ka rezultuar se kompania ka shkelur kushtet e lejes së ndërtimit. Si pasojë, dy përfaqësues të firmës janë vënë nën hetim për këtë shkelje.
Po ashtu, edhe biznesmeni tjetër Lulzim Morina është bërë i pandehur për ndërtim të paligjshëm pas hetimeve që kanë zbuluar se kompania që ai administron ka tejkaluar lejet e ndërtimit për disa godina banimi dhe shërbimesh gjatë periudhës 2021-2024.
Autoritetet kanë identifikuar disa shkelje të ngjashme, ku është konstatuar që ndërtimet janë realizuar pa respektuar parametrat dhe kushtet e miratuara në lejet e dhëna.
Këto hetime vijnë si pasojë e ankesave nga qytetarët të cilët kishin raportuar ndërtimet pa leje dhe shkeljet e mundshme.
Si rezultat, janë regjistruar procedime penale për të dyja kompanitë dhe përfaqësuesit e tyre, ndërsa hetimet vijojnë për të zbardhur më tej shkeljet dhe për të përcaktuar përgjegjësitë.
