Gjykata e Durrësit ka vendosur këtë të dielë masat e sigurisë për shtatë persona të ndaluar dy ditë më parë në një lokal luksoz në zonën e Gjirit të Lalzit, gjatë një operacioni të organizuar nga Policia e Durrësit dhe forcat speciale.
Gjashtë prej tyre janë lënë në “arrest me burg”, ndërsa një tjetër është lënë në “detyrim paraqitje”.
Arrest me burg:
• Xhevdet Plaku, 45 vjeç, banues në Durrës, i njohur me nofkën “Akili”. Ishte shpallur në kërkim ndërkombëtar nga autoritetet italiane pas arratisjes nga burgu i Ankonës në janar 2025. Ai akuzohet për “Trafikim të narkotikëve” dhe gjatë kontrollit iu gjet një armë zjarri me fishek në fole, gati për përdorim.
• Flobenc Meçja, alias “Gega”/“Drini”, 43 vjeç, nga Shkodra. I kërkuar nga SPAK për përfshirje në një organizatë kriminale, sigurim kushtesh për vrasje dhe mbajtje armësh. Iu gjetën dy dokumente të falsifikuara dhe një armë zjarri e mbushur.
• Voltan Xhani, 39 vjeç, lindur në Përmet, me rezidencë në Holandë. I përfshirë në hetime për trafikim mjetesh motorike dhe sigurim kushtesh për vrasje në Shkodër. Armë zjarri iu sekuestrua në çantën personale.
• Jugert Xhani, 35 vjeç, lindur në Përmet. Nën hetim për mbajtje pa leje të armëve luftarake, moskallëzim dhe përkrahje të autorit të krimit. Gjatë kontrollit iu sekuestrua armë dhe municion luftarak.
• Oltion Hasani, 38 vjeç, nga Mamurrasi. I dyshuar për moskallëzim krimi dhe përkrahje të autorit.
• Fatjon Qesja, 36 vjeç, banues në Tiranë. Po ashtu, nën hetim për të njëjtat akuza si Hasani.
Detyrim paraqitje:
• Alfred Hasanaj, 45 vjeç, banues në Mamurras. Ndaj tij u vendos masa më e lehtë e sigurisë. Ai duhet të paraqitet çdo të hënë në orën 10:00 pranë Policisë Gjyqësore dhe i ndalohet të largohet nga territori i Shqipërisë pa lejen e gjykatës. Pasaporta e tij është sekuestruar.
Operacioni u zhvillua në kuadër të një hetimi të nisur më herët mbi veprimtari të dyshuar kriminale të personave të përfshirë, ku autoritetet raportojnë se janë gjetur armë zjarri të gatshme për përdorim, dokumente të falsifikuara dhe elementë që lidhen me grupet e strukturuara kriminale.
