Gjykata jep vendimi burg i përjetshëm, vrau kunatën për xhelozi
Burg përjetë për Dashamir Xhepën, i cili akuzohet se vrau kunatën e tij dhe më pas e hodhi në liqenin e Sharrës. Ngjarja e rëndë ndodhi në 13 shkurt të 2019-ës. Gruaja 49-vjeçare, Lirie Xhepa, nëna e 4 fëmijëve, u gjet e pajetë pranë kodrave të liqenit të Sharrës.
Pas shqyrtimit gjyqësor, gjykata e Tiranës ka dhënë vendimin final për të akuzuarin. Gruaja ishte dhunuar dhe më pas ishte qëlluar me dy plumba në trup dhe më pas ishte hedhur aty. Dyshohet se ngjarja ka ndodhur për shkak të një konflikti për pronat, që kishte nisur prej disa vitesh mes dy familjeve.
Konfliktit të pronave iu shtua edhe xhelozia e kunatit për marrëdhënie intime që ajo, sipas tij, kishte krijuar me një burrë tjetër.
“Kishim konflikte për pronat pas ndarjes nga jeta të vëllait tim, na kishte ulur reputacionin e familjes duke krijuar marrëdhënie intime me të tjerë në fshat, ndaj e vrava”-ka deklaruar Dashamir Xhepa, para gjykatës.
Kanë qenë banorët e zonës të cilët kanë njoftuar policinë, ndërsa nuk kanë arritur ta identifikojnë pasi kishte plagë edhe në fytyrë.
Djali i saj i vogël, i cili jetonte me të, ka bërë identifikimin e trupit nënës në morg, në atë kohë.
Ajo ishte nëna e katër djemve, dy prej të cilëve jetonin jashtë shtetit, një ndodhej në burg, dhe djali i vogël ishte në shkollë.
Viktima merrej me blegtori, dhe së fundmi kishte nisur punë pranë një fabrike këpucësh.
Dashamir Xhepa pas dy javësh nga dita e vrasjes, u arrestua në qytetin e Peshkopisë, ku ishte strehuar gjatë arratisë. /Gazetareforma.com/
