Gjykata e Posaçme ka rrëzuar për të tetën herë kërkesën e ish-gjyqtares Enkelejda Hoxha për një masë më të butë sigurie. Ajo u arrestua në shkurt të këtij viti për korrupsion, ndërsa kërkoi një masë më të butë me argumentin për gjendjen shëndetësore të fëmijëve të saj.
Përveç djalit të saj, për të cilin është raportuar se ka probleme të shëndetit mendor, sipas ekspertizës, duket se edhe vajza e mitur ka shfaqur probleme psikologjike. Megjithatë gjykata e ka rrëzuar sërish kërkesën e saj dhe ka lënë në fuqi masën e sigurisë “arrest me burg”.
Enkelejda Hoxha u arrestua në 11 shkurt 2021, me urdhër të SPAK. Disa prej vendimeve të saj kishin të bënin me lirimin nga burgu të të dëuarve përjetë apo për vepra të rrezikshme penale. Më 7 nëntor të vitit 2017, Enkeleida Hoxha liroi nga burgu Genci Tafilin, vëllanë e Admir Tafilit, të dy emra shumë të njohur për drejtësinë shqiptare, të akuzuar dhe dënuar për disa vepra penale.
Genc Tafili është liruar në vitin 2017 me kusht nga Gjykata e Krujës nga gjyqtarja Enkeleida Hoxha, pasi kreu 17 vite burg.
Po atë vit, ish-gjyqtarja liroi nga burgu edhe Ilir Pajën, i cili ishte i njohuar me nofkën “UFO” nga drejtësia italiane, duke qenë se ishte arratisur tri herë.
