Gjykata e Lartë vendosi sërish të rrëzojë kërkesën për ndryshimin e masës së sigurisë ndaj Arben Meskutit dhe për heqjen e sekuestros preventive mbi pasuritë e tij, duke e lënë atë në paraburgim lidhur me dosjen e “Mikrokredive”.
Meskuti akuzohet për mashtrim ndaj mijëra qytetarëve debitorë përmes një skeme piramidale financiare, ku ai është pronar i disa shoqërive që operonin në fushën e mikrokredive.
Hetimet për këtë rast nisën në shkurt 2020 nga Prokuroria e Tiranës, pas një kallëzimi të Ministrisë së Drejtësisë. Sipas akuzës, pesë shoqëritë, Micro Credit Albania, ADCA, SHP Zig, FS dhe FLASH kishin marrë nga një bankë e nivelit të dytë 3,999 kredi të pashlyera dhe me probleme, me vlerë totale rreth 7.3 milionë euro.
Në dhjetor 2023, Prokuroria e Tiranës shpalli moskompetencë për këtë çështje dhe e kaloi atë në Prokurorinë e Posaçme Antikorrupsion, e cila vijon hetimet.
