Ditën e sotme, Gjykata e Posaçme ka lënë në burg ish-truprojën e ish-ministrit të Brendshëm, Saimir Tahiri.
Avokati tij është shprehur për mediat se vendimi është i padrejtë dhe do ta ankimojnë atë. Sipas avokatit, klienti i tij Hekuran Marku nuk ka lidhje me akuzat e pretenduara dhe pretendoi se klienti i tij është i pafajshëm.
“Edhe gjatë seancave që do të zhvillohen do të kundërshtojmë. Do të tregojmë që Marku s’ka lidhje me veprat penale për të cilën është marrë i pandehur. Me Bregasin njihet gjatë fushatës elektorale. Se çka bërë Bregasi Marku s’ka dijeni. Njohja e tij përfundon vetëm në kuadër të fushatës elektorale të vitit 2015. Në 2013 ka filluar punë në gardë dhe në kuadër të fushatës elektorale ka rastësisur që është njohur me Elion Bregasin. Atje është njohur me të dhe sipas akteve”, tha avokati.
Kujtojmë që Gjykata e Posaçme ka dhënë vendimin “arrest me burg” ndaj Markut, ndaj të cilit rëndojnë akuzat e “Trafik narkotikësh”, “Pastrimi i produkteve të veprës penale”, “Grup i strukturuar kriminal” dhe “Kryerja e veprave penale nga organizata kriminale dhe grup i strukturuar kriminal”.
47-vjeçari Hekuran Marku u ekstraduar një ditë më parë nga Gjermania në Shqipëri, për tu përballur me akuzat. Ndërkohë mësohet se ish-truproja tjetër e Tahirit, Paulin Deda, është ende i lirë në Francë, pasi ka kërkuar azil politik atje dhe autoritetet franceze duke shqyrtuar kërkesën e tij.
