Gjykata e Durrësit do të shqyrtojë sot, më 16 korrik, kërkesën për lirimin me kusht të Arbër Paplekajt, i dënuar me 7 vite burg për vrasjen e Pjerin Xhuvanit në Elbasan, më 21 prill 2021.
Ish-efektivi i RENEA-s kërkon që të lirohet nga burgu, duke argumentuar se ka vuajtur më shumë se gjysmën e dënimit, çka sipas tij e bën të drejtë kërkesën për përfitim nga liria me kusht.
Vendimi i fundit për Paplekajn u mor nga Gjykata e Apelit më 1 korrik 2024, e cila ndryshoi kualifikimin e veprës penale ndaj tij. Ai nuk u dënua më për “vrasje në rrethana cilësuese”, por për “vrasje në kushtet e tronditjes së fortë psikike”, çka solli uljen e dënimit në 7 vite burg.
Ngjarja për të cilën u dënua Paplekaj ndodhi pak ditë para zgjedhjeve të 25 prillit 2021, gjatë një përplasjeje mes përfaqësuesve të Partisë Demokratike dhe atyre të Partisë Socialiste në Elbasan.
Struktura e ngritur nga PD për “mbrojtjen e votës” ndaloi automjetin e Mehmet Grecës, duke e akuzuar për blerje votash. Ky i fundit thirri në ndihmë Pjerin Xhuvanin.
Situata degjeneroi në shkëmbim zjarri, ku mbeti i vrarë Xhuvani, ndërsa disa persona të tjerë u plagosën, përfshirë edhe dhëndrin e tij dhe një police.
Paplekaj ka qenë pjesë e strukturës së PD-së për mbrojtjen e votës dhe, sipas hetimeve, ka qenë ai që qëlloi me armë ndaj Xhuvanit në rrethana ende të debatueshme. Vendimi i sotëm i Gjykatës së Durrësit pritet me interes të lartë publik.
