Gjykata e Durrësit ka vendosur masën e sigurisë “arrest shtëpie” për Kreshnik Farrukun, i cili u vetëdorëzua sot në polici, së bashku me vëllanë e tij, Erneo Farrukun.
Ky vendim është marrë pas masës së sigurisë “arrest me burg” që kishte caktuar Gjykata e Brescia-s ndaj Kreshnik Farrukut për akuzat e “Organizatës kriminale” dhe “Trafikimit të lëndëve narkotike”.
Farruku ishte një nga të shumëkërkuarit, me 10 emra të ndryshëm.
Kujtojmë se në maj të vitit 2019, ai u arrestua në Spanjë, bashkë me vëllanë dhe një anëtar tjetër të familjes.
Njoftimi i Gjykatës së Durrësit:
SHURTIM-VENDIM
“NË EMËR TË REPUBLIKËS”
Gjykata e Shkallës së Parë e Juridiksionit të Përgjithshëm Durrës, e përbërë prej:
GJYQTAR: ARBËR ÇELA
Me sekretare gjyqësore A. A. në seancën gjyqësore të datës 07.01.2025 i dha fund gjykimit të kërkesës penale Nr. 8 Akti që u përket:
Kërkuesi:Prokuroria pranë Gjykatës së Shkallës së Parë të Juridiksionit të Përgjithshëm Durrës, përfaqësuar në gjykim nga prokurore A. Bebeçi.
Personi i kërkuar:K. B. alias S.F. (K.), i biri i R. dhe Xh., i datëlindjes 1974, lindur dhe banues në A., M., Durrës, me shtetësi dhe kombësi shqiptare, me gjendje gjyqësore i pa dënuar. Mbrojtur në gjykim nga Av.A. Hoxha, i zgjedhur me deklarim në seancë.
Objekti:1. Miratimin e arrestit të përkohshëm për qëllim esktradimi të shtetasit K. B. alias S. F. (.), pasi Gjykata e Brescia, Itali me vendimin Nr. 12042/2020 RGNR-5352/2021 RI GIP, datë 29.08.2024, ka caktuar ndaj tij në masën e sigurimit “Arrest në burg”, si të dyshuar për veprat “Organizat kriminale” dhe “Trafikim i lëndëve narkotike” parashikuar nga legjislacioni penal Italian.
2. Caktimin ndaj tij të masës së sigurimit personal “Arrest në burg” të parashikuar nga neni 238 të Kodit Penal, me qëllim ekstradimi, për llogari të Drejtësisë Italiane.
Baza ligjore:Nenet 228, 229, 238, 251, 258, 259, 493 e vijues të K.Pr.Penale.
PËR KËTO ARSYE
Gjykata, në bazë dhe për zbatim të nenit 112, 259 dhe 495 të K.Pr.Penale, si dhe të nenit 44 të Ligjit Nr. 10193, datë 03.12.2009 “Për marrëdhëniet Juridiksionale me Autoritetet e Huaja në Çështjet Penale”,
VENDOSI
1. Miratimin e arrestit të përkohshëm të shtetasit Shqiptar K. B. alias S. F. (K.), i biri i R. dhe Xh., i datëlindjes 1974, pasi Gjykata e Brescia, Itali me vendimin Nr. 12042/2020 RGNR-5352/2021 RI GIP, datë 29.08.2024, ka caktuar ndaj tij në masën e sigurimit “Arrest në burg”, si të dyshuar për veprat “Organizat kriminale” dhe “Trafikim i lëndëve narkotike” parashikuar nga legjislacioni penal Italian.
2. Caktimin e masës së sigurimit personal “Arrest në shtëpi”, parashikuar nga neni 237 i Kodit të Procedurës Penale, ndaj personit nën hetim K. B. alias S. F. (K.), masë e cila do të ekzekutohet në banesën e tij të ndodhur në Rruga “F. N.”, A., M., Durrës, (sipas deklarimit të tij në seancë).
3. Urdhërohet Prokuroria pranë Gjykatës së Shkallës së Parë të Juridiksionit të Përgjithshëm Durrës për ekzekutimin e këtij vendimi.
4. Kundër këtij vendimi mund të bëhet ankim brenda 5 ditëve në Gjykatën e Apelit të Juridiksionit të Përgjithshëm Tiranë, duke filluar ky afat nga e nesërmja e komunikimit të vendimit të arsyetuar.
U shpall sot në Durrës, më datë 07.01.2025.
