Dy ditë më parë gjykata e Durrësit refuzoi kërkesën e krybashkiakes Valbona Sako për t’i dhënë vërtetimin e mandatit. E ndërsa sot, ka qenë po kjo gjykatë që ia dha këtë mandat edhe pse e refuzoi dy ditë më parë.
Partia Socialiste ditën e djeshme ka ribërë sërish një kërkesë për të marrë vërtetimin në Gjykatë.
Por këtë radhë, kërkesa është bërë nga Partia Socialiste si subjekt politik, dhe jo më nga kandidatja si në rastin e parë.
Shpëtim Reka ka qenë ai që u mor me këtë çështje, ndaj edhe sot vendosi t’i jepte mandatin kryetares së bashkisë së Durrësit, Valbona Sakos të zgjedhur nga PS.
Kreu i PD-së Lulzim Basha ka reaguar përmes një statusi nërrjetin social Facebook, lidhur me këtë vendim të gjykatës.
Basha shkruan se ky vendim tregon se drejtësia është shpartalluar dhe se Shqipëria po kthehet në një shtet afrikan, pasi është nën kontrollin e plotë të Ramës.
“E gjithë drejtësia është nën kontrollin e plotë të Ramës. Vendimi i Gjykatës së Durrësit është vendimi i drejtësisë private që ka vendosur Edi Rama në Shqipëri.
Ky shpartallim i sistemit të drejtësisë do të prodhojë për një kohë të gjatë pasoja të rënda për vendin dhe qytetarët.
Nëse nuk e ndalim sa më parë Edi Ramën, Shqipëria do kthehet në një shtet tërësisht të falimentuar afrikan.”, shkruan Basha në Facebook.
