Nuk ka shkuar e qetë mirëseardhja e Komisionerit Europian për zgjerimin, Oliver Varhelyi, i cili mbajti në orën 16.00 një fjalë në Kuvend. Menjëherë, pas fjalës së komisionerit, deputeti Ralf Gjoni i është drejtuar me fjalët: “Çfarë kërkoni ta bëni Shqipërinë, një vend autokratësh?” Ai i kërkoi Komisionerit që BE të mbajë parasysh faktin se vendi po braktiset dhe mbeten vetëm pensionistët, si Spartak Braho.
Ndërkaq, Gjoni është përplasur me Vasilika Hysin dhe Halit Valterin. Deklaratat e tij ndaj presidentit turk Erdogan nuk janë pritur mirë nga Hysi, e cila i ka thënë të mos i diskriminojë njerëzit në bazë të besimit fetar. Ndërkohë edhe deputeti Valteri i ka kërkuar Ralf Gjonit të ketë kujdes kur fletë për fenë islame, ndërkohë që i ka kërkuar drejtueses së seancës Vasilika Hysi që të largojë nga seanca këta njerëz islamofobë.
“Nuk mund të diskriminosh njerëzish në bazë të besimit fetar. Kur ta dëgjoni fjalën prapë do e kuptoni që keni gabuar”, ndërhyri Hysi.
“Zonja Hysi ju nuk mund të më tjetërsoni fjalën. Në jemi vend laik, e kam fjalën për alternativat fetare që hyjnë në politikë. Me alternativat fetare të sponsorizuara nga miku i Ramës, Erdogani. Dhe ne do detyrohemi që me familjet tona të largohemi. Ju s’po e kuptoni se çfarë po ndodh në këtë vend. Sot po flas si shqiptar i shkolluar jashtë që ka vendosur për të ardhur këtu dhe të investojë në këtë vend”, deklaroi Gjoni.
“Lëre fenë jashtë parlamentit dhe kujdes kur të flasësh për gratë me shami se janë më të ndershme se ti dhe shokët e tu. Zonja kryetare, njerëz që janë islamofobë kaq të thekur i largoni nga kjo seancë. Ralf, jam më shqiptar se ti të paktën. Mos fol këtu”, iu drejtua Halit Valteri:.
Më parë komisioneri i Zgjerimit i BE-së, në fjalën e tij përshëndetëse, sa i përket çështjes së anëtarësimit të Shqipërisë, është shprehur se vendet e Ballkanit Perëndimor janë në fokusin e Komisionit Europian.
“Zoti kryetar, faleminderit për fjalët e mira dhe mikpritjen e ngrohtë, por më dhatë një vend ku ulen monarkët, dhe unë nuk jam i tillë. Është një nder të flasësh në parlamentin që përfaqëson popullin dhe të japësh mesazhin se ne po punojmë për ju që të jeni anëtarë të BE. Për Komisionin Europian vendet e Ballkanit Perëndimor kanë qenë në fokus gjatë gjithë kohës. Ne kemi bërë disa hapa përpara për të çelur negociatat për anëtarësimin në Bashkimin Europian, ashtu si edhe Maqedonia e Veriut, duke kaluar ngërçin që kishim”, tha ndër të tjera Varhelyi.
