Tre persona në Durrës janë arrestuar nga policia, pasi akuzohen se kanë vënë 50 mijë euro gjobë ndaj një sipërmarrësi me qëllim zhvatjen.
Jeta e biznesmenit ishte në rrezik, pasi prej disa kohësh kërcënohej nga këta tre persona. Nëse ai nuk paguante 50 mijë euro, të ndara në këste, jeta e tij dhe e familjarëve rrezikohej seriozisht.
Tre personat e arrestuar janë Lulzim Zalla, 45 vjeç banues në Fushë Krujë. Ky person konsiderohet i rrezikshëm nga policia. Personi i dytë i arrestuar është Egi Shullazi, 26 vjeç, banues në Krujë dhe Klodian Estrefi 40 vjeç, banues në Xhafzotaj në Durrës.
Të tre këta persona akuzohen se i kanë vendosur një gjobë prej 50 mijë eurosh biznesmenit N.L.
Mësohet se dy prej tyre u arrestuan në flagrancë, teksa po merrnin këstin e radhës prej 50 mijë eurosh nga biznesmeni durrsak, i cili ishte në shantazh prej disa muajsh.
Lulzim Zalla konsiderohet një person i rrezikshëm nga policia, pasi për të nuk qarkullon asnjë informacion, njësoj si të ishte një person fantazmë.
Policia e ka konsideruar si një person tejet të rrezikshëm, është thuajse “fantazmë”. Egi Shullazi, 26-vjeçari nga Kruja, mesa duket ka ditur se si t’i shijojë lekët e marra nga gjobvënia.
Ai ka bërë disa udhëtime jashtë vendit dhe makinat e shtrenjta duket që janë pasionet e të riut.
E ndërsa, i arrestuar i tretë Klodian Estrefi, mesa duket ka qenë më modesti nga dy të tjerët. Ai ka bërë udhëtime vetëm brenda Shqipërisë, si në Syrin e Kaltër, por ajo që vihet re është stili i tij i veshjes me kostume sportive origjinale, që me siguri janë tepër të shtrenjta.
Të tre këta persona, tashmë janë arrestuar nga policia dhe do të përballen para gjykatës me akuzat për veprën penale “Shtrëngimi me anë të kanosjes ose dhunës për dhënien e pasurisë “, në bashkëpunim.
