Deputetja e zgjedhur e e Partisë Demokratike, Jorida Tabaku ka thënë se gjoba që Shqipëria duhet t’i paguajë Francesco Becchetti-t ka filluar të arkëtohet. Në një postim në Facebook, Tabaku thotë se institucionet nuk bëjnë transparencë ndërsa përgjegjësi për këtë faturë mohon dhe mashtron, duke përdoru shtetin si mburojë. Ajo shprehet se shqiptarët i kanë paguar shtrenjtë dështimet dhe korrupsionin e këtij regjimi dhe tani duhet të paguajë Edi Rama dhe shpura e tij.
Postimi i plotë:
Lufta personale e Edi Ramës me Francesco Becchetti, do t’iu kushtojë shqiptarëve 120 milionë euro.
Kjo është shuma me interesat aktuale që çdo familje do të paguajë nga xhepat e saj. Mediat raportojnë se kjo shumë ka filluar të arkëtohet. Institucionet nuk bëjnë transparencë, ndërsa përgjegjësi për këtë faturë mohon dhe mashtron, duke e përdorur shtetin si mburojë për t’u mbrojtur nga dëmi i madh ekonomik që u ka shkaktuar shqiptarëve.
Partia Demokratike ka kallëzuar në #SPAK gjithë personat e përfshirë në këtë çështje dhe teksa impakti për buxhetin e shtetit po bëhet real, kjo dosje nuk mund të vijojë të marrë pluhur në sirtarët e drejtësisë.
Ky abuzim me pushtetin duhet ndëshkuar, sepse Shqipëria, e varfëruar dhe e vjedhur nga ky regjim, 120 milionë euro duhet t’i përdorë për të ndërtuar shkolla, spitale dhe infrastrukturë, jo për të paguar luftën personale të Edi Ramës.
Shqiptarët i kanë paguar shtrenjtë dështimet dhe korrupsionin e këtij regjimi, tani duhet të paguajë Rama dhe shpura e tij!
