Gjykata e Posaçme kundër Krimit të Organizuar dhe Korrupsionit ka vendosur sot të refuzojë kërkesën e ish-presidentit Ilir Meta për ndryshimin e masës së sigurisë “arrest në burg”.
Shqyrtimi i kërkesës u bë nga gjyqtari Erjon Çela, pasi javën e kaluar gjyqtari Erjon Bani kishte shpallur moskompetencë.
Avokatët e Metës kishin propozuar më parë një masë më të lehtë, si bllokimi i pasaportës, duke argumentuar se nuk ekziston rrezik që ish-presidenti të largohet apo arratiset.
Avokati Kujtim Cakrani u shpreh se:
“Gjykata duhet të mbajë parasysh jo vetëm historikun e tij si drejtues shteti, ish-kryeministër, ish-kryetar kuvendi, ish-president, por edhe faktin që në këto momente kërkuesi i pandehuri z. Ilir Meta është edhe president i Partisë Lirisë, forcës politike opozitare të dytë në Shqipëri”.
Seanca e kaluar ishte shtyrë pasi Cakrani kërkoi që çështja për masën e sigurisë të shqyrtohej nga gjyqtari që kishte ndjekur dosjen në hetimin fillestar, Erjon Çela, dhe jo nga gjyqtari i posaçëm Erjon Bani.
Gjyqtari Çela ishte me pushime javën e kaluar, dhe për këtë arsye shqyrtimi i kërkesës iu caktua Banit, i cili shpalli moskompetencë.
Ish-presidenti Ilir Meta akuzohet për korrupsion, pastrim parash dhe fshehje pasurie, lidhur me dosjet e lobimit të LSI-së në SHBA dhe aferën CEZ-DIA. Ai u arrestua më 21 tetor 2024 dhe që nga ajo kohë ndodhet në paraburgim me masën “arrest në burg”.
