Gjykata e Posaçme Kundër Korrupsionit dhe Krimit të Organizuar (GJKKO) ka refuzuar kërkesën e Ajola Xoxës, bashkëshortes së kryebashkiakut të Tiranës, Erion Veliaj, për rikthimin e telefonit të sekuestruar gjatë kontrolleve në banesën e saj më 6 dhjetor.
Kontrollet u zhvilluan nga agjentët e BKH-së në kuadër të një procedimi penal, ku u sekuestruan telefonat e Ajola Xoxës dhe Arbër Veliajt, vëllait të kryebashkiakut. Sipas GJKKO-së, vendimi për sekuestrimin e telefonit dhe kryerjen e kontrolleve ka qenë i ligjshëm.
Seanca për shqyrtimin e ankimimit të Xoxës u zhvillua sot nga gjyqtarja Atalanta Zeqiri.
Ndërkohë, një tjetër ankimim është depozituar nga avokatët mbrojtës në Apelin e GJKKO-së, duke pretenduar se kontrollet janë kryer në shkelje të ligjit procedural.
Ky ankim pritet të shqyrtohet nga gjyqtarja Ilirjana Olldashi, por ende nuk është caktuar data e seancës.
Kontrollet e BKH-së përfshinë edhe zyrat e kompanisë së Ajola Xoxës dhe banesën e vëllait të kryebashkiakut.
Prokuroria e Posaçme ka konfirmuar se veprimet hetimore lidhen me një procedim penal, ku po hetohet pasuria e Veliajt dhe përfshirja e tij në çështjen e inceneratorit të Tiranës dhe kompanisë “5D”.
