Procesi gjyqësor i njohur si “Plumbi i Artë” ka rinisur këtë të martë në Gjykatën e Posaçme kundër Korrupsionit dhe Krimit të Organizuar, mes debateve të ashpra mbi dëshminë e bashkëpunëtorit të drejtësisë, Nuredin Dumani.
Prokurorja e SPAK, Doloreza Musabelliu, kërkoi që dëshmia e Dumanit të zhvillohet me dyer të mbyllura, duke argumentuar se përmban informacione konfidenciale që mund të dëmtojnë imazhin publik të procesit.
Ndërkohë, avokatët e mbrojtjes dhe i pandehuri vetë kundërshtuan këtë kërkesë dhe kërkuan praninë e mediave në sallë.
Megjithatë, Gjykata e Posaçme pranoi kërkesën e prokurores, çka shkaktoi revolta nga ana e të pandehurve dhe avokatëve të tyre. Si rezultat, të gjithë të pandehurit dhe mbrojtësit e tyre braktisën sallën në shenjë proteste për nxjerrjen e mediave nga procesi.
