Gjykata e Posaçme ka vendosur masë sigurie ndaj zëvendës kryeministres dhe ministres së Infrastrukturës dhe Energjisë, Belinda Balluku, duke e pezulluar nga detyra dhe duke i ndaluar daljen jashtë vendit. Vendimi është marrë pasi Balluku është shpallur zyrtarisht e pandehur për shkelje të barazisë në tendera publike.
Hetimi lidhet me procedurën e tenderit për ndërtimin e tunelit të Llogarasë, në seksionin rrugor Orikum Himarë, pjesë e autostradës SH8 Vlorë Sarandë. Procedura u hap fillimisht më 11 dhjetor 2020, u anulua dhe u rihap më 22 qershor 2021, me fond limit 18,967,810,952.08 lekë pa TVSH.
Pak pas vendimit të GJKKO, Balluku është paraqitur në Kryeministri. Ajo ndodhet nën akuzë dy herë për shkelje të barazisë në tendera. Përveç çështjes së tunelit të Llogarasë, dyshimet e organit të hetimit përfshijnë edhe procedura të tjera, ndër të cilat tenderi për lotin 4 të Unazës së Madhe.
