Gjirokastra po kthehet në një ndër destinacionet më të preferuara për turistët e huaj që udhëtojnë me motoçikleta, sidomos gjatë pranverës.
Rrugët me kalldrëm, itineraret në terren malor dhe pamjet piktoreske e bëjnë qytetin e gurtë një strehë ideale për të apasionuarit pas aventurës dhe motoçiklizmit.
Këtë pranverë, grupe motoçiklistësh nga vende si Franca dhe Italia kanë mbërritur në Gjirokastër, duke zgjedhur ta eksplorojnë Shqipërinë mbi dy rrota. Njëra prej tyre, Sonja, një turiste franceze që udhëton me një grup prej nëntë motoçiklistësh, rrëfen përshtypjet e para:
“Është një vend i jashtëzakonshëm. Vizituam kalanë, që është një monument i bukur me një pamje që të lë pa fjalë. Mot i mirë, diell… po e shijojmë çdo moment.”
Edhe vizitorët nga Italia tregohen të impresionuar nga natyra dhe trashëgimia kulturore shqiptare:
“Po bëjmë një udhëtim nëpër Shqipëri. Vizituam Vlorën, Sarandën… vende vërtet të mrekullueshme.”
Turizmi i aventurës po fiton gjithnjë e më shumë terren në Gjirokastër, falë ndërthurjes mes historisë dhe natyrës së paprekur.
Me afrimin e verës, pritet që ky trend të intensifikohet, duke e kthyer qytetin në një nga destinacionet kryesore për ata që kërkojnë udhëtime të lira, ndryshe dhe plot emocion.
