LUSHNJË
Koronavirusi ka nisur që të infektojë shumë zyrtarë, deri ata më të lartë, ndërsa nuk kursen edhe bluzat e bardha.
Kjo edhe për shkak se pikërisht mjekët, janë ata që kanë qenë në vijën e parë të luftës ndaj Covid-19.
Kështu, sot një mjek gjinekolog në maternitetin e Lushnjës “Ihsan Çabej”, ka rezultuar pozitiv në testin e koronavirusit.
Menjëherë pasi u konfirmua rasti i mjekut, iu është bërë testimi të gjithë mjekëve e stafit, ndërsa përgjigjet o të dalin në ditët në vazhdim.
Për pasojë, Materniteti “Ihsan Çabej” në qytetin e Lushnjës u mbyll, për një kohë të papërcaktuar.
Duke qenë se mungon materniteti, autoritetet shëndetësore kanë vendosur që vizitat të bëhen në ambulancë dhe qendra shëndetësore të lagjeve.
Kujtojmë se shumë mjekë janë prekur nga koronavirusi, madje disa prej tyre edhe kanë ndërruar jetë.
Bluzat e bardha janë ata që kanë luftuar më shumë me këtë virus, që u shfaq për herë të parë në nëntor 2019 në Kinë, ndërsa më tej u shpërnda në Europë dhe mbarë botën.
Në Shqipëri, deri tani janë shënuar qindra vdekje për shkak të koronavirusit.
