Deputeti i PS, Damian Gjiknuri paralajmëron largimin e drejtuesve të lartë të Policisë së Shtetit, që kanë përgjegjësi për vrasjen e Klodian Rashës.
“Ngjarje e rëndë. Dhe polici nuk ka vepruar në mënyrë profesionale. Tani ai është para drejtësisë. Kur pati një përshkallëzim protestash, u dorëhoq ministri. Ai nuk kishte përgjegjësi direkte, por mbajti përgjegjësi politike. Hetimi të shkojë deri në fund dhe të nxjerrë përgjegjësitë, qoftë të individit që kreu aktin apo dhe zinxhirit komandues”, u shpreh Gjiknuri në një intervistë televizive.
Sipas socialistit, situata tashmë po përdoret politikisht për ta mbajtur rendin në vend të tensionuar.
“Kemi parë eksponentë para grupimeve të të rinjve që kanë qenë eksponentë politikë që nxisin turmën. Ne jemi dëshmitarë të rasteve të kaluara, këtu janë vrarë qytetarë në Bulevard. (Flet për 21 Janarin) Zinxhiri komandues i Gardës jo vetëm që nuk u dorëhoq, por u mbrojtën nga qeveria.
Kosto nga aktet e dhunës, është nga një grup njerëzish të motivuar politikisht, PS nuk ka asnjë kosto. Ky është një shfrytëzim i situatës nga aktorë politikë për të mbajtur të tensionuar situatën”, u shpreh Damian Gjiknuri
