Ekspertja e Komitetit Teknik ka reaguar në lidhje me rastin e 22 vjeçares së infektuar me variantin britanik, e cila u konstatua si rast nga ekspertët e shëndetit në Gjermani.
Në mbledhjen e zhvilluar sot të komitetit Teknik, Silva Bino nga Instituti i Shëndetit Publik bëri të ditur se menjëherë pas publikimit të këtij rasti kanë nisur hetimet në bashkëpunim me Institutin gjerman Robert Koch. Sipas Binos, autoritetet gjermane nuk kishin asnjë informacion për këtë rast.
“Ai është një rast i publikuar në një gazetë gjermane dhe i publikuar edhe tek ne. Menjëherë nisëm hetimin tonë nëpërmjet ‘counterpart –it’ tonë në Institutin Robert Koch në Berlin, ku gjendet edhe pika fokale në lidhje me koordinimin e rasteve që vijnë nga vende të ndryshme. Ata nuk kishin asnjë informacion mbi këtë rast dhe me thanë që për këtë rast nuk ka asnjë hetimi dhe investigimi, në dallim nga një rast tjetër që është evidentuar me variantin e Afrikës së Jugut, për të cilin ne kemi komunikuar qoftë me autoritetet e vendit përkatës, apo me autoritetet gjermane. Pra si i përket këtij rasti, ky është një rast mediatik, për të cilin hetimi ynë nuk ka nxjerrë kontakte në vend apo elementë të tjerë sic kemi pasur raste të tjera që janë hetuar me hollësi”, tha Bino.
Kujtojmë se sipas të përditshmes “Frankfurter Allgemeine Zeitung”, 22-vjecarja ishte kthyer nga Aeroporti i Rinasit në Hochtaunus, ku jeton si emigrante.
E reja kishte shfaqur simptoma të lehta të Covid-19, por që pas ekzaminimeve laboratorike rezultoi të jetë infektuar me mutacionin B117.
