Pas tre ditën gjendje alarmi në Bulqizë ku numri i personave të helmuar ka arritur në 113, ka bërë reagimin e tij edhe Instituti i Shëndetit Publik.
Përfaqësuesja e institucionit, Rovena Daja ka thënë se pikërisht helmimi mund të jetë shkaktuar nga uji dhe për këtë arsye janë udhëzuar banorët mos të konsumojnë ujë nga çezmat deri në një njoftim të dytë.
Pas dhënies së këtij lajmërimi, Daja thotë se ka rënë ndjeshëm numri i personave të prekur, mirëpo ende janë duke u pritur rezultatet që do të dalin nga uji.
“Ne për momentin kemi udhëzuar që uji të mos konsumohet dhe realisht që nga ky moment numri i rasteve është ulur shumë. Lagjja që është prekur konsumon kryesisht ujin e rrjetit dhe ky fakt na bën të mendojmë se ky mund të jetë shkaktar i helmimit. Epidemia mund të jetë shkaktuar nga uji. Të gjitha rastet e helmimeve kanë qenë të lehta Kemi udhëzuar të mos pihet ujë këto ditë ”, u shpreh ajo.
