Gjendet i vdekur në një nga qelitë e burgut të Peqinit, Andon Mëhillaj, anëtar i grupit të Julian Sinanajt që kryente vrasje me pagesë.
Burime për Dosja.al bëjnë me dije se Mëhillaj është gjetur i pajetë ditën e djeshme dhe dyshohet se ka vdekur që ditën e shtunë.
Burimet thonë gjithashtu se Mëhillaj vuante prej kohësh nga depresioni, madje merrte edhe disa ilaçe për këtë arsye. Ai ka qenë i dënuar me burgim të përjetshëm për disa akte kriminale.
Mëhillaj u dorëzua në polici në vitin 2014 dhe dyshohet se prej vitesh merrte porosi nga njerëz të ndryshëm për atentate me eksploziv ose me armë.
Asokohe, i vetëdorëzuari në polici, Andon Mëhillaj dhe kushëriri i tij dyshohej se kanë qenë porositësit e të gjithë krimeve të pranuara nga Julian Sinanaj.
