Mbledhja e Komisionit të Edukimit dhe Medias ka dështuar ditën e sotme. Kryetari i këtij komisioni, Agron Gjekmarkaj tha për mediat se opozita u paraqit në sallë në përputhje me ligjet e vendit, por maxhoranca nuk e do një përballje.
Gjekamrkaj tha se kjo është një qeveri e dalë nga masakra zgjedhore e 25 prillit dhe shtoi se opozita nuk lutet, pasi përfaqëson shumicën e qytetarëve shqiptarë.
“Opozita u paraqit në sallën e komisionit të edukimit dhe medias, në përputhje me ligjet e vendit. U paraqit për të respektuar parlamentarizmin dhe lirinë e fjalës. Gjendemi përpara një situate absurde. Maxhoranca nuk u paraqit, nuk u paraqit sepse nuk do përballjen me opozitën. Nuk duan të diskutojnë për çështjen e arsimit në Shqipëri, për shkollat që mbyllen, për 2 orë mësim në ditë në shkollat shqiptare. Kjo është një qeveri që ka dalë nga masakra zgjedhore e 25 prillit, i konvenon të shmangë çdo debat. Opozita nuk lutet, nuk është e vogël, përfaqëson shumicën e qytetarëve shqiptarë. Do jemi këtu për betejë të përditshme, betejë me regjimin. Nuk do ta ketë të lehtë Edi Rama përballjen me opozitën e Shqipërisë. Komisioni nuk u konstitua, por opozita u paraqit që të fillonte normalisht. Pjesëtarët e maxhorancës nuk erdhën sepse kanë urdhër. i bëj thirrje Nikollës të mos bëhet certifikuese e dëshirave të Edi Ramës. Të ndjekë shembullin e Pjetër Arbnorit, të Servet Pëllumbit”, ka thënë Gjekmarkaj.
