Kombëtarja shqiptare ka arritur një tjetër fitore historike. Kësaj here kuqezinjtë fitojnë në Budapest 1-0 ndaj Hungarisë, duke mbajtur gjallë ëndrrën për një vend në play-off të Botërorit 2022.
Klaus Gjasula ka folur pas përfundimit të ndeshjes dhe është shprehur i kënaqur për fitoren që ka arritur në “Puskas Arena” duke mbajtur gjallë shpresat për kualifikim në Kupën e Botës, Katar 2022.
Mesfushori i Shqipërisë u shpreh se kjo fitore shkon për Berat Gjimshitin, i cili u detyrua të linte fushën e lojës në minutën e 30 pasi theu dorën në një përplasje me Berishën. Ai ka shtuar se ndeshja me Poloninë do të jetë një finale për ne.
“Ishte një fitore shumë e rëndësishme, kartoni nuk më intereson fare. Ndeshja me Poloninë një finale për ne. Duhet t’ia dalim. Rasti? Gjuajta, e zura mirë, do kisha bërë golin e parë, do të ishte shumë i rëndësishëm, sepse ka dhe vajza ditëlindjen, do t’i dedikohej asaj”.
Më tej mesfushori ka thënë se shpresojnë shumë që të mos pësojnë gol, ndërsa shroi se do të krijojnë raste dhe do të shënojnë gol.
“Me Poloninë do të jetë ndeshje afërsisht si sonte, e rëndësishme është të mos pësojmë gol. Do të krijojmë raste sepse kemi kualitete dhe do të shënojmë. Me tifozët do të tregojmë veten tonë”
Gjasula u shpreh se ndihet i lodhur, por që do ta rimarri veten deri në ndeshjen tjetër.
“Jam i lodhur, kemi dhe ca ditë, por do të jemi të rikuperuar. Kjo fitore ishte për Gjimshitin. Ka thyer dorën. Na erdhi shumë keq, është lojtar shumë i rëndësishëm, tani është në spital. Jemi me ty, gjithë të mirat”, u shpreh Gjasula.
