Prej disa kohësh përflitet se Gert Bogdani do të jetë kandidati i Partisë Demokratike për Tiranën në zgjedhjet e ardhshme lokale. Edhe vetë Bogdani nuk e ka mohuar diçka të tillë dhe ka thënë se diçka e tillë është diskutuar në bazën e PD. Në një intervistë për A2CNN disa ditë më parë, Bogdani u shpreh se nëse lidershipi do e shohë të arsyeshëm një kandidim të tillë, ai nuk do iu bëjë bisht sfidave
“Është diskutuar vjet në bazën e Partisë Demokratike, ku u morën propozimet nga baza për përfaqësuesit në Kuvendin e Shqipërisë, por dhe kryetarët e bashkisë në qytete të ndryshme. Dhe një propozim masiv nga baza e Tiranës ka sjellë në këtë diskutim ku ne jemi sot. Nëse lidershipi i PD do ta shohë të arsyeshme, unë nuk iu bëj bisht sfidave, por përballem me to”, tha Bogdani.
Mirëpo emri i Gert Bogdanit nuk është i papërfolur më parë në lidhje me afera korruptive. Një foto shumë e diskutuar e tij në krah të Mirel Mërtirit, ka mbetur ende pa shpjegim.
Kush është Mirel Mërtiri?
Mërtiri, ka prej vitesh një duzinë kontratash për punë publike dhe koncesione, pa u ekspozuar asnjëherë personalisht.
Emri i Mirel Mërtirit është përmendur jo pak herë në aferat e inceneratorëve, sa herë përmendet edhe emri i Klodian Zotos. Klodian (Mirel) Mërtiri, është një lidhje e ngushtë e biznesmenes Stela Gugallja, pronare e “Albtek Energy”, kompani e cila zotëron kontratën koncensionare të inceneratorit të Elbasanit. Mirel Mërtiri është ndër të tjera edhe administrator i kompanisë “E.R One”, në pronësi të Stela Gugallja dhe kompanisë italiane ‘Energy Recuperator”, në pronësi të Ernesto Granelli. Ernesto Granelli rezulton të jetë një nga bashkëpunëtorët e Klodian Zotos në kompaninë “Integrated Technology Service”, e regjistruar në Hollandë dhe që ka në pronësi inceneratorin e Tiranës.
Mërtiri, i cili deri tani njihej vetëm si emër që qëndron pas inceneratorëve në pronësi formale të Klodian Zotos, është paraqitur në Zimbabve me emrin Ilir Dedja. Agjencia e lajmeve “Zimlive”, publikoi skandalin e tenderit të ilaçeve në vend, ku Mërtiri ishte i përfshirë. Bëhej fjalë për një tender për pajisje mjekësore dhe medikamente që ishte nënshkruar me kompaninë e shqiptarit, e cila nuk rezultonte e regjistruar në regjistrin përkatës shtetëror.
E njëjta media ka publikuar një foto të zyrtarëve të lartë të atij vendi, me biznesmenin shqiptar Ilir Dedja (Klodian Mërtiri) dhe ish-deputetin e Partisë Demokratike, Gerti Bogdani.
Ky i fundit nuk ka dhënë asnjë shpjegim për këtë foto. Pavarësisht se Partia Demokratike pretendon të denoncojë aferën e inceneratorëve, për rastin në fjalë nuk është shprehur ndodnjëherë dhe madje është gati ta kandidojë Bogdanin për Tiranën.
