SPAK ka ankimuar sot në Apel vendimin e GJKKO për ish-ministrin e Mbrojtjes, Fatmir Mediu.
GJKKO rrëzoi kërkesën e SPAK për rihetim të Mediut për tragjedinë e Gërdecit. Vendimin për rrëzimin e kërkesës nga SPAK e mori gjyqtari Erjon Çela.
SPAK kërkon rrëzimin e vendimit të Shkallës së Parë dhe pranimin e kërkesës dhe nisjen e gjykimit. Fatmir Mediu është i akuzuar si një ndër përgjegjësit e tragjedisë së Gërdecit dhe ishte Gjykata e Shkallës së Parë kundër Krimit dhe Korrupsionit ajo që ka rrëzuar kërkesën e SPAK për rihapjen e hetimit ndaj ish-ministrit.
Sjellim në vëmendje se në vendimi, mes të tjerash, GJKOKO “çmon që të evidentojë se edhe pse kuadri kushtetues dhe ligjor përcakton se deputeti nuk gëzon imunitet parlamentar për ndjekjen penale apo gjykimin e tij konstatohet se që prej vitit 2012 e në vazhdim (më shumë se 8 vjet), organi i akuzës nuk ndërmori hapat e nevojshëm sipas ligjit për ushtrimin e ndjekjes penale megjithëse tashmë nuk ishte më e nevojshme që të kërkohej të jepej autorizimi nga Kuvendi i Republikës së Shqipërisë. Pra, nga vitit 2012 deri më datë 1 Gusht 2017 kur hynë në fuqi ndryshimet e K.Pr.Penale me Ligjin Nr. 35/2017, prokuroria nuk ka pasur asnjë pengesë që të rimerte të pandehur shtetasin Fatmir Mediu pa kërkuar autorizim për ndjekje penale apo të kërkonte rishikim të vendimit. Në kushtet kur prokuroria nuk e ka ushtruar ndekjen penale për një periudhë mbi dhjetë vjet edhe pse nuk ka pasur një pengesë të tillë, Gjykata çmon se ajo nuk mund të ushtrohet më tashmë bazuar në nenin 66 gërma “b” të Kodit Penal dhe në nenin 328 pika 1 gërma “d” të K.Pr.Penale”.
