Ish-ministri i Mbrojtjes, Fatmir Mediu, ka reaguar ndaj akuzave që lidhen me ndryshimin e kalibrave të municioneve, duke i cilësuar ato si absurde dhe qesharake.
Sipas Mediut, nuk ka asnjë akt ligjor që përcakton kalibrat e municioneve dhe vendimet në këtë drejtim janë marrë nga Shefi i Shtabit të Përgjithshëm dhe strukturat ushtarake të specializuara.
Ai theksoi se si ministër, i emëruar në 2005, kishte si detyrë përmbushjen e standardeve të NATO-s dhe demontimin e municioneve të tepërta, që përbënin rrezik.
“Gjyqet popullore do ta kishin zili seancën e sotme. Nuk është serioze, por absurde deri në qesharake. Akoma më keq kur paraqita dokumente të Ministrit të Mbrojtjes dhe Shefit të Shtabit të Përgjithshëm, të firmosura para se të merrja detyrën, që tregojnë se marrëveshja me SHBA për demontimin e municioneve ishte e qartë dhe ligjore,” u shpreh Mediu.
Ai shtoi se Forcat e Armatosura kanë vepruar sipas ligjit dhe se marrëveshjet me aleatët janë firmosur në përputhje me ligjet shqiptare.
