Biznesmeni Gentjan Sula ka apeluar në GJKKO kundër sekuestrimit të një apartamenti pranë Gardës në Tiranë, të cilin Prokuroria e Posaçme e Antikorrupsionit e ka sekuestruar në kuadër të hetimeve për ish-kryebashkiakun Jorgo Goro.
Seanca e planifikuar për këtë të hënë u shty për shkak të mungesës së prokurorit Ols Dado.
Sula, i cili ishte thirrur për dëshmi nga Prokuroria e Posaçme, ka pretenduar se apartamenti i sekuestruar është pronë e tij dhe se ia kishte lënë në përdorim Goros për shkak të marrëdhënieve miqësore që kishin.
Mbrojtja e tij ligjore ka kërkuar anulimin e sekuestrimit, duke theksuar se pronësia është e tij dhe jo e Goros.
Hetimet për çështjen që ka lidhje me ish-kryebashkiakun Goro janë mbyllur disa ditë më parë dhe SPAK ka kërkuar kalimin e dosjes për gjykim.
Në orën 13:00 të hënën, SPAK pritet të shpallë pretencën për Goro, Vezir Gjikokën dhe Jerasimo Basho. Për Bilbil Aliajn, GJKKO ka vendosur ndarjen e çështjes, pasi ai ka kërkuar gjykim të zakonshëm.
