Biznesmeni Gentian Sula është paraqitur në Prokurorinë e Posaçme këtë të mërkurë, në zbatim të masës së sigurisë “detyrim paraqitje”, lidhur me hetimet për dosjen “Veliaj”.
Sula është një nga biznesmenët e përfshirë në hetimin ndaj kryebashkiakut të Tiranës, Erion Veliaj, dhe dyshohet se ka përfituar tendera nga Bashkia e Tiranës.
Lidhja e Gentian Sulës me Veliajn, sipas SPAK, fillon kur Veliaj mbante postin e Ministrit të Punës dhe Çështjeve Sociale.
Gjatë kësaj periudhe, Veliaj ka blerë një banesë në bllokun “Kodra e Diellit” në Tiranë, një projekt në pronësi të kompanisë së ndërtimit të Sulës, “Agi Kons”.
Pas këtij momenti, Veliaj ka emëruar bashkëshorten e Sulës si zv/minister.
Marrëdhënia mes dy palëve ka vazhduar edhe pas kalimit të Veliajt në krye të Bashkisë Tiranë, kohë kur kompania “Agi Kons” ka fituar leje ndërtimi të shumta, përfshirë ndërtimin e vilave në bregdet.
SPAK thotë se Veliaj ka në pronësi tre vila në fshatin rezidencial Qerret në Kavajë, ndërtuar nga “Agi Kons”.
Këto lidhje dhe përfitime, sipas SPAK, janë shoqëruar me tendera të shumtë që i janë dhënë kompanisë së Sulës në fusha të ndryshme, duke përfshirë zhvillimin e infrastrukturës dhe projekte publike, që përkthehen në miliona euro fonde.
Hetimi është ndihmuar nga një denoncim i bërë nga Nesti Angoni, një person që sipas SPAK ka ofruar informacion mbi lëvizjet e familjes Veliaj dhe lidhjet e tyre me biznesmenë të ndryshëm.
