Ekonomia rrezikohet nga akoma nga pandemia dhe rivendosja e izolimit, si edhe bllokimi i kreditimit nga bankat, deklaron Guvernatori i BSH, Gent Sejko. “Këshilli Mbikëqyrës gjykon se balanca e rreziqeve vijon të mbetet në kahun e poshtëm.
Në veçanti, rreziqe të kahut të poshtëm burojnë nga: zgjatja e theksuar në kohë e pandemisë dhe ri-prezantimi i mundshëm i masave të distancimit social për kontrollin e saj; lindja e problemeve në mekanizmin e transmetimit të politikës monetare, në formën e rritjes së normave të interesit dhe kostove të financimit të sektorit privat, në formën e përkeqësimit të ofertës së kredisë bankare”, deklaroi Sejko.
Këshilli Mbikëqyrës vëren se materializimi i këtyre rreziqeve do të kërkonte lehtësimin e mëtejshëm të qëndrimit të politikës monetare. Guvernatori i Bankës së Shqipërisë, Gent Sejko i bëri këtor deklarata sot, në një konferencë për mediat, ku ka folur në lidhje me vendimmarrjen e politikës monetare, teksa ekonomia shqiptare ndodhet në ndikimin e pandemisë së COVID-19.
Ai theksoi se tashmë situata serioze për shkak të pandemisë, ka ardhur drejt reduktimit në tremujorin e dytë të vitit.
Sipas guvernatorit, jetësimi i skenarëve bazë është i kushtëzuar nga COVID-19, ndërsa shtoi se stimuli fiskal e zbut efektin e pandemisë. Ndër të tjera Sejko tha se stabiliteti financiar është parakusht për ekonominë, duke nënvizuar faktin se norma bazë e interesit do të mbetet e pandryshuar. “Ekonomia do t’i kthehet ringritjes vitin e ardhshëm, nëse nuk kemi një përkeqësim të situatës. E rëndësishme është se harmonizmi i politikave financave mes BSH-së dhe qeverisë, janë të koordinuara.”, pohoi ai.
Në këtë kontekst, duke gjykuar dhe mbi projeksionet e skenarit bazë dhe balancën e rreziqeve rreth tyre, Këshilli Mbikëqyrës vlerësoi se qëndrimi aktual i politikës monetare mbetet i përshtatshëm. Për këtë arsye, ai vendosi: të lerë të pandryshuar normën bazë të interesit, në nivelin 0.5%; të lerë të pandryshuar normat e interesit të depozitave dhe kredive njëditore, respektivisht në 0.1% dhe 0.9%.
/Gazeta Reforma/
