Pas marrjes së detyrës, Gent Cakaj ka bërë edhe vizitën e tij të parë si Ministër i Jashtëm.
Cakaj ka qenë i pranishëm në takimin e Ministrave të Punëve të Jashtme të vendeve anëtare të Bashkimit Evropian dhe vendeve kandidate të zhvilluar në Bukuresht. Kjo është vizita e parë e kreut të diplomacisë shqiptare jashtë vendit dhe sipas njoftimit të nxjerrë nga kjo ministri duket se ka qenë e suksesshme.
Në njoftimin zyrtar thuhet se ky takim është realizuar në kuadër të marrjes së Presidencës rumune të Këshillit të Ministrave të BE-së, prej ku Cakaj ka folur rreth integrimit të vendit në Union.
“Ministri në detyrë Cakaj, pasi vlerësoi mbështetjen e vendeve anëtare të BE-së në rrugën e integrimit evropian të Shqipërisë, vuri në dukje përpjekjet dhe arritjet e deritanishme në këtë proces, duke shprehur angazhimin e vendosur për forcimin e tyre, si edhe pritshmëritë tona që bisedimet e anëtarësimit të jenë njohje e arritjeve dhe mekanizëm për orientimin e tyre të ardhshëm.
Ai evidentoi gjithashtu rolin proaktiv e konstruktiv të Shqipërisë si faktor stabiliteti në rajon, duke shtuar se në aspektin global, vendi ynë dëshmon me vendosmëri orientimin e tij strategjik euroatlantik dhe linjëzim të plotë me politikën e jashtme dhe të sigurisë të BE-së”, thuhet në njoftim.
