Ndërkohë që pritet të filloi protesta e partive opozitare e cila do të pezullojë trafikun për rreth 60 minuta, janë dhënë disa detaje nga ajo se çfarë pritet të ndodhë nga ora 18:00-19:00.
Sekretari i Përgjithshëm i Partisë Demokratike, Gazmend Bardhi në një deklaratë për media ka ripërsëritur se do të ndalojnë zhvillimin e zgjedhjeve të 30 qershorit.
Kujtojmë që më herët nga foltorja e kuvendit kryeministri Rama theksoi se, kush do të tentojnë që të bllokojnë procesin zgjedhor i pret burgu, mesa duket kjo për PD-në nuk është një kërcënim.
Nga selia blu, Bardhi tha se ndalimi i makinave sot, është hapi i parë që do të pasohet me ndalimin e zgjedhjeve ‘falso.’
“Shqiptarët e kanë kuptuar këtë skemë grabitëse dhe rrënuese për familjet dhe fëmijët e tyre dhe janë të vendosur t’i japin fund kësaj gjendjeje. Sot, me ndalimin e makinave në të gjithë Shqipërinë, nesër me ndalimin e zgjedhjeve fallco. Kërcënimet e një kufome politike si Edi Rama nuk trembin askënd! Rruga jonë është pa kthim! E vetmja rrugë e drejtë për Shqipërinë si Europa janë zgjedhjet e lira e të ndershme,” –theksoi Bardhi.
