Gazetari Adriatik Doçi, i cili ka marrë pjesë në Komisionin e Sigurisë Kombëtare, ka dhënë një deklaratë të fortë , në lidhje me atë që sipas tij është kontrabandë e nënshtetësisë shqiptare nga Presidenti i Republikës.
Doçi ka zbuluar në Këshillin e Sigurisë se shtetasi kosovar i dënuar për vrasjen e një familje 5-anëtarëshe, mes të cilëve 3 fëmijë dhe që ka marrë nënshtetësinë shqiptare nga presidenti Meta, është Arsim Fadil Ramadani, i lindur në Bajicë të Kosovës.
“Rreth 90% e personave që kanë marrë nënshtetësinë, nuk shquhen as si shkencëtarë dhe as sportistë. Kam dokumentuar dy raste që kanë probleme shumë të rënda dhe nuk e nderojnë Shqipërinë. Sot dua të ndaj dhe një rast tjetër.
Ky rast ka të bëj me dhënien e nështetsisë ndaj një persnoi, të dënuar me 30 vite burg për vrasjen e një familje, ku tre anëtarë janë fëmijë. Arsim Fadil Ramadani, i lindur në Bajicë të Kosovës, i pajisur me pasaportë shqiptare”, ka thënë gazetari Adriatik Doçi në Komisionin e Sigurisë Kombëtare.
Ndër të tjera, në Komisionin e Sigurisë, gazetari ka thënë se dyshimet e tij kanë lindur pasi për 10 vite janë dhënë 76 nënshtetësi të veçanta nga Presidentët e mëparshëm, ndërsa nga Meta në 3 vite janë dhënë mbi 400 nënshtetësi të tilla.
“Dyshimet e mia kanë lindur gjatë verifikimit të procedurave të 10 viteve më parë me kohën e drejtimit të Presidencës nga Ilir Meta. Nga viti 2007 deri në vitin 2017 janë dhënë 76 nënshtetësi të vecanta, ndërsa nga META janë dhënë mbi 400. Dyshimet janë shtuar dhe kur dekretet janë fshirë nga faqa e Presidencës”, ka thënë Doçi./GazetaReforma.com.
