Gazetari Spartak Koka ka zbuluar detaje të reja që lidhen me ngjarjen tragjike në Qerret të Kavajës, ku humbën jetën katër shtetas rusë. I ftuar në emisionin “Opinion”, Koka tha se në të njëtjin hotel ka gjetur vdekjen edhe një shtetas polak 55 vjeç, ngjarje që ka ndodhur rreth dy-tre muaj më parë.
Gazetari tregoi se shkaku i vdekjes është vendosur arrest kardiak, ndërsa ka dyshime për përdorim të lëndës narkotike. Për këtë ngjarje është vendosur mosfillim I çështjes, ndërsa nuk dihet nëse është aksidentale, shtoi gazetari.
“Në të njëjtin hotel para 2-3 muajsh ka gjetur vdekjen një shtetas polak 55 vjeç. Në të njëjtin hotel, në të njëjtin SPA. Dhe po ju jap informacion. Shkaku i vdekjes i shtetasit polak është vendosur arrest kardiak. Dyshohet se është përdorur lëndë narkotike. Është dy tre muaj më parë. E kam të konfirmuar nga policia dhe prokuroria e Kavajës. Është vendosur mosfillim i çështjes. A është aksidentale? Emrin nuk arrita dot ta marr sot”, tha Spartak Koka.
Kujtojmë që katër shtetasit rusë u gjetën të pajetë mbrëmjen e së premtes në një hotel në Qerret të Kavajës. Fillimisht u tha se ata kishin humbur jetën nga asfiksia në saunën e hotelit, ndërsa tashmë policia po e heton çështjen si vrasje, pas daljes në dritë edhe të detajeve të tjera.
