Gazetari Mentor Kikia ka akuzuar kryeministrin Edi Rama se ka shfrytëzuar arrestimin e mjekut Edvin Prifti për propagandë. I ftuar në “Arena” në RTV Ora, Kikia tha se Rama do ta shesë si sukses së luftës ndaj korrupsionit.
“Rama po e tund si flamur arrestimin e mjekut Priftit se do ta shesë si sukses së luftës ndaj korrupsionit. Kryeministrat gjithmonë kanë thënë që në kohën tuaj vidhej më shumë.Askush nuk ka ngritur një sistem ku të ketë disa hallka pengese të korrupsionit në mënyrë që mjeku të mos ndihet pronar i sallës së operacionit dhe qytetari apo pacienti të mos duket si kavje.”, deklaroi ai.
Kujtojmë se pezullimi mjekut kardiolog i QSUT erdhi pasi u përmend në përgjimet e SPAK për Gjykatën e Krujës.
Në bisedat telefonike të publikuara, Prifti u kap duke biseduar me Manuela Mallakuçi, për një operacion që nëna e saj do të kryente, të cilës i kërkoi dhe 2000 euro.
Më pas policia në kontrollin e banesës dhe të zyrës, i gjetën mjekut dhe 250 mijë euro në shtëpi dhe 16 milionë lekë në zyrë, të cilat i sekuestroi.
Sipas avokatit dhe vetë mjekut ato para janë shumë lehtë të vërtetueshme, pasi ka vite në profesion dhe ka fituar çmime të shumta ndërkombëtare. Por ky pretendim nga ana e mjekut u hodh poshtë nga gjykata e cila dha masën e sigurisë “arrest me burg”.
