Banorët e Rripit të Gazës po përballen me një krizë të thellë humanitare, ndërsa bllokada e plotë dhe luftimet e pandërprera po shkaktojnë vuajtje ekstreme në të gjithë rajonin.
BBC ka zhvilluar intervista me banorë nga çdo cep i Gazës, të cilët tregojnë se nuk arrijnë të sigurojnë as një vakt të vetëm për familjet e tyre. Ndihmat mungojnë, shpërndarja e ushqimeve dhe ujit është ndërprerë, ndërsa çmimet e ushqimeve bazë janë rritur në nivele të papërballueshme, duke e shtyrë popullatën drejt një katastrofe të vërtetë ushqimore.
Në një pikë shpërndarjeje ushqimi në veri të Gazës, një djalë 6-vjeçar, Ismail Abu Odeh, pasi u përpoq gjatë për të marrë një tas me thjerrëza, e rrëzoi atë nga duart dhe u largua duke qarë, i zhgënjyer dhe i uritur. Ky episod i dhimbshëm përshkruan përditshmërinë e shumë fëmijëve të Gazës që nuk kanë mundësi të ushqehen.
Në kampet e të zhvendosurve, mijëra banorë jetojnë me frikën se ndihmat nuk do të mbërrijnë më, pasi shumica e kuzhinave janë mbyllur për shkak të mungesës së furnizimeve. Ushqimi që mund të gjendet është shumë i shtrenjtë, duke detyruar familjet të përdorin metoda kreative për të mbijetuar. Disa prej tyre përgatisin bukë me përbërës minimalë, si një nga të vetmet mënyra për të ushqyer veten.
Një grua 23-vjeçare nga veriu i Gazës tha për BBC: “Dhimbja e kokës më është bërë e vazhdueshme dhe ndihem shumë e dobët për shkak të mungesës së ushqimit dhe ilaçeve.” Ajo dhe familja e saj fshihen çdo ditë për shkak të bombardimeve që nuk ndalen, duke jetuar me frikën e humbjes së jetës.
Në spitale, infermierët përballen me një situatë alarmante. Mungesa e barnave dhe materialeve mjekësore po vë në rrezik jetën e pacientëve. Spitali Evropian në Khan Younis është goditur nga një sulm ajror izraelit dhe shumë prej stafit janë zhvendosur në spitalin Nasser, ku gjithashtu ndihen të pambrojtur.
Në kushte të tilla, një baba nga Gaza rrëfeu: “Fëmijët e mi flenë të uritur. Ndonjëherë, kur nuk arrij t’u siguroj ushqim, ndihem si një fëmijë dhe qaj në heshtje.”
Izraeli e përshkruan bllokadën si një “mjet të nevojshëm” për të luftuar Hamasin dhe për të liruar pengjet, ndërsa akuzon këtë grup për përvetësimin dhe tregtimin e ndihmave humanitare. Por Kombet e Bashkuara dhe organizata të tjera ndërkombëtare kanë ngritur alarmin për situatën e rëndë humanitare, duke paralajmëruar se Gaza po afrohet gjithnjë e më shumë me një uri masive.
Gjaku mungon në spitale, qytetarët nuk mund të dhurojnë për shkak të anemisë
Ndërkohë, zëdhënësi i Ministrisë së Shëndetësisë në Gaza, Khalil al-Degran, ka deklaruar se pasojat e urisë po ndihen në mënyrë të theksuar tek popullata, ku shumë persona vuajnë nga anemia e rëndë si pasojë e kequshqyerjes.
Sipas tij, kjo gjendje po bllokon edhe mundësinë e dhurimit të gjakut, çka e rëndon më tej krizën në spitale. “Spitalet po përballen me mungesë të menjëhershme të gjakut, ndërsa numri i pacientëve të plagosur rëndë nga bombardimet është në rritje,” tha al-Degran, duke theksuar se ndihma ndërkombëtare është jetike për të përballuar këtë situatë.
