Lulzim Basha sillet sikur të jetë zëvendëskryeministër i Ramës, kur bën fushatë për biznesin. Kreu i opozitës flet për garancinë sovrane të qeverisë, e cila duhet lehtësuar, sipas tij, që të përfitojnë bizneset. Kjo është një nismë dështuar që nxori qeveria në fillim të Pandemisë, fillimisht me 11 miliardë lekë dhe më pas me shpalljen e një faze të dytë për kreditë me 5 për qind interes. Bizneset përfituan shumë pak, sepse kushtet e bankave nuk i vendos qeveria, thjesht hiqej detyrimi për kolateralin.
Kreu i PD, Lulzim Basha ka kërkuar nga Fushë-Kruja që të rishihet skema e garancisë sovrane duke vendosur kushte të reja si përfitimi nga ata që kanë vërtet nevojë dhe me interesa të përballueshme. Basha akuzoi qeverinë se gjatë karantinës nga garanci sovrane përfituan vetëm një grusht njerëzish apo oligarkët.
”Të rishihet skema e garancisë sovrane. Garancia sovrane që vendet e tjera i vunë në dispozicion sipërmarrjeve, i shërbyen edhe fondit për pagat edhe për investime, dhe shpenzime operative, me interesa të përballueshme, jo në stratosferë. Se pastaj janë të pamundura.
E dyta, me kritere që t’i përballojnë të gjithë. Ajo sipërmarrje që ka nevojë për kredi të tillë, ta marrë pavarësisht lidhjeve e njohjeve me qeverinë. Ndërkohë e ashtuquajtur garanci sovrane gjatë karantinës përfituan një grusht njerëzish. Ata të përhershmit që populli i quan oligarkë. Nuk janë ekonomia ata, ata shkatërrojnë ekonominë, garën dhe vendet e punës. Duhet që nga garancia sovrane të përfitojnë të gjithë ata që kanë nevojë. 6 muajt e ardhshme do jenë edhe më të vështira se ato të parat. Prandaj duhet të rishihen kushtet.”- tha Basha.
Guvernatori i Bankës së Shqipërisë Gent Sejko deklaronte në fund të muajit maj 2020 se “deri tani nga fondi i parë i garancisë në kushtet e pandemisë kanë përfituar 260 biznese të vogla, me një vlerë totale 29 milionë euro, ndërsa janë edhe 320 aplikime që po shqyrtohen. Në fund të korrikut, numri i përfituesve ishte 548 biznese. Si rrjedhojë, sipas shifrave të muajit gusht 2020, nga fondi ishte shpenzuar vetëm 38 përqind.
Është e qartë se skema e garancisë sovrane nuk ka për të funksionuar asnjëherë dhe paratë nuk do të arrijnë tek biznesi. Opozita do të duhet të sillte ndonjë alternativë, jo të merret përmirësimin e skemave të Ramës.
/Gazeta Reforma/
