Nis sot zyrtarisht fushata elektorale, si asnjëherë më parë në kushte të pazakonta pandemie.
Partia Demokratike dhe Partia Socialiste, dy partitë kryesore në vend, do të çelin këtë të enjte fushatën afërsisht në të njëjtën orë, por takimet do të zhvillohen në dy vende të ndryshme.
Për shkak të pandemisë së koronavirusit, beteja politike pritet të zhvillohet kryesisht në rrjetet sociale, apo në tubime të vogla informative, në bazë të protokollit që tashmë është miratuar nga Komiteti Teknik i Ekspertëve.
Takimi i PS organizohet në sheshin kryesor të kryeqytetit “Skënderbej” rreth orës 18:00, për të vijuar më tej në të gjithë vendin.
Ndërsa takimi i PD pritet të zhvillohet në sheshin “Nënë Tereza” në orën 17:00. Në këtë ceremoni, së bashku me krydemokratin Lulzim Basha, do të jenë të pranishëm edhe të gjithë kandidatët e Partisë Demokratike, në 12 qarqet e vendit.
Lidhur me hapjen zyrtare të fushatës elektorale, më herët ka reaguar dhe Komisioni Qendror i Zgjedhjeve. KQZ u bëri apel të gjithë drejtuesve të institucioneve publike të tregojnë vetëpërmbajtje dhe të përmbushin detyrimet e tyre sipas Kodit Zgjedhor.
“Duke marrë në konsideratë raportet e para të depozituara nga monitoruesit, Komisioni Qendror i Zgjedhjeve, në përmbushje të përgjegjësive të veta dhe me qëllim për të përgatitur, zhvilluar dhe administruar zgjedhjet e datës 25 prill, i bën apel të gjithë drejtuesve të institucioneve publike të tregojnë vetëpërmbajtje e të përmbushin detyrimet e tyre sipas Kodit Zgjedhor”, thuhej në njoftimin e KQZ.
Sa i përket fondeve për fushatën, në total do të akordohen 130,000,000 lekë, pjesën më të madhe të cilave e merr Partia Socialiste, si partia që ka marrë më shumë vota në zgjedhjet e vitit 2017, e ndjekur nga Partia Demokratike dhe Lëvizja Socialiste për Integrim.
Kujtojmë se situata parazgjedhore në Shqipëri ka qenë e tensionuar. Përmendim këtu përplasjen e Presidentit, Ilir Meta, për zyrat e FRD-së. Po ashtu kujtojmë dhe përplasjen fizike mes militanëtëve të PD dhe PS në Ditën e Verës në Elbasan, e cila ngjalli dhe reagime të shumta. E fundit ngjarje ishte sherri mes biznesmenit Gjergj Luca dhe deputetit demokrat Luçiano Boçi.
Lidhur me këto situata kanë reaguar dhe OSBE/ODIHR, të cilët bënë thirrje për qetësim të situatës, duke paralajmëruar se çdo ngjarje do të dokumentohet në tre raporte kryesore.
