Ambasadorja e SHBA-së, Yuri Kim ka qënë sot në qytetin e Shkodrës, ku ka zhvilluar takime me përfaqësues politikë të zonës.
Kim ka takuar kandidatët e parë të listës së PD-së dhe PS-së në këtë qark, Helidon Bushatin dhe Edona Bilalin.
Gjithashtu, dy javë më parë Ambasadorja zhvilloi një takim me përfaqësuesit kryesor të partive politike në qytetin e Elbasanit.
Ajo u përcolli mesazhin e SHBA-së drejtuesve politikë, Taulant Balla, Gazmend Bardhi, Monika Kryemadhi e Rudina Hajdari.
“Fuqia përfundimtare qëndron te votuesit. Atyre që u kërkohet t’u blihet vota do t’u thoja: Vota juaj është pushteti juaj, prandaj mos e dorëzoni këtë!” nënvizoi ambasadorja në një prononcim për mediat pas takimit në Elbasan më 10 mars.
Këto takime të ambasadores Kim vijnë në kohë fushate, vetëm një muaj larg zgjedhjeve të 25 prillit.
Në daljet e fundit publike, Yuri Kim u ka bërë thirrje kryetarëve të partive të mos fusin në lista kandidatë për deputetë që kanë probleme me ligjin, pasi do të mbajnë përgjegjësi vetë ata.
Ambasadorja amerikane ka folur me emra, kujtojmë këtu Tom Doshin, për të cilin ambasadorja ka kërkuar të mos lejohet pjesëmarrja e tij në zgjedhje. Pavarësisht thirrjeve, një javë më parë KQZ e pranoi kandidimin e tij në krye të partisë “Social Demokrate” .
Kujtojmë gjithashtu se KQZ njoftoi se 15 deputetë të tjerë janë çuar për hetim të thelluar në Prokurori, pasi janë vënë re probleme me ligjin.
